Peek hindi makakalaro sa Texters

MANILA, Philippines - Maglalaro ang nagdedepensang Talk ‘N Text na wala si power forward Ali Peek.

Ito ay matapos mabaril ang 6-foot-4 Fil-Am sa batok mula sa isang suspek na nagtangkang pagnakawan siya sa labas ng RFM Gym sa Pioneer St., Mandalu­yong City noong Lunes ng gabi.

Ang naturang suspek ay napansin na ng mga naglalaro sa RFM gym na pa­gala-gala bago ang pagkabaril sa mas­kuladong si Peek.

Ang bala ay kasalukuyan pang naka­ba­on sa bungo ni Peek.

Sinabi ni Tropang Texters’ head coach Chot Re­yes na si Peek mismo at ang kan­yang ina ang magdedesisyon kung ipa­­patanggal ang naturang bala o iiwanan na lamang sa kanyang bungo. 

 Si Peek ay nagpapagaling na sa Me­dical City sa Pasig.

Naglatag na si Talk ‘N Text team ow­ner Manny V. Pangilinan ng pabuyang P500,000 para sa anumang impormas­yon at pagka­kahuli sa suspek.

“He’s a very strong person, but obviously these things have a way of getting to you,” wika ni Reyes sa panayam ng ANC. 

“He’s in a state of what I might call se­mi-shock. The enormity of what happened is just starting to sink in,” dagdag pa ng men­tor kay Peek.

Nakatakdang sagupain ng Tropang Tex­­ters ang Powerade Tigers ngayong alas-7:30 ng gabi sa elimination round ng 2011-2012 PBA Philippine Cup sa Smart-Ara­neta Coliseum.

Tangan ng Rain or Shine ang liderato sa kanilang 6-1 kartada kasunod ang Talk ‘N Text (5-1), Barako Bull (5-2), Meralco (5-3), Petron Blaze (4-3), Barangay Gi­nebra (3-4), B-Meg (3-4), Powerade (3-4), Alas­ka (1-6) at Shopinas.com (0-7).

Sa unang laro sa alas-5:15 ay magtatagpo naman ang Boosters at Clickers, naghahanap ng kanilang kauna-unahang panalo.