Caniga mihatag dungog sa nasud

CEBU, Philippines - Ang Sugbuanong Mixed Martial Arts fighter nga si Johnlery 'Ian' Caniga mihatag og dungog sa nasud human midaog isip grand champion sa Navarro's Mixed Martial Arts Championship niadtong Sabado didto sa Pacifica sa California, USA.

Si Caniga, 20-anyos ug tinun-an sa University of Cebu (UC) sa kursong BS Criminology, mikampiyon sa tulo ka martial arts disciplines nga naglakip sa Stick fighting (arnis), Brazilian Jiu-jitsu (Gi) ug Muay Thai ug third placer siya sa Brazilian Jiu-jitsu (No Gi).

Isip grand champion, si Caniga midawat og usa ka life-size trophy ug duha ka 22-carat gold rings ug plaque.

"Ako gyud gihatag ang tanan para ato gyud ni," matud pa ni Caniga. "Proud to be Filipino."

Si Caniga maoy labing unang Cebuano sa kasaysayan sa MMA nga miduwa og MMA tournament didto sa Estados Unidos.

Si Caniga gimanso sa iyang amahan ug Yaw-Yan ArDigma Martial Arts Federation founder Master Benigno 'Ekin' R. Caniga Jr. ug Yaw-Yan ArDigma senior arnis instructor Grandmaster Max Caballes. (BANAT SPORTS)