MANILA, Philippines - Matapos mabalam ang kanilang three-game winning streak, nakabalik sa kanilang dating porma ang Energy para masolo ang pangatlong puwesto.
Matapos kunin ang isang 14-point lead sa first period ay dumiretso na ang Barako Bull sa 117-78 paglampaso sa Powerade sa elimination round ng 2011-2012 PBA Philippine Cup kahapon sa Smart-Araneta Coliseum.
Bago igupo ang Tigers ay nagmula muna ang Energy sa isang 72-93 kabiguan sa Aces noong Nobyembre 3.
“This is a team of veterans and rookies and they just wanted to show that they are of capable of bouncing back from that humbling loss to Alaska,” sabi ni head coach Junel Baculi sa kanyang koponan.
Dala ngayon ng Barako Bull ang 5-2 baraha sa ilalim ng Rain or Shine (6-1) at nagdedepensang Talk ‘N Text (4-1) kasunod ang Meralco (5-3), Petron Blaze (4-3), Barangay Ginebra (3-3), Powerade (3-4), B-Meg (3-4), Alaska (1-6) at Shopinas.com (0-7).
Kasalukuyan pang naglalaro ang Tropang Texters at ang Gin Kings habang isinusulat ito.
Mula sa 22-6 lamang ay pinalaki ng Energy ang kanilang bentahe laban sa Tigers, nagmula sa 108-94 paggupo sa Boosters noong Oktubre 30, sa halftime, 62-29.
Humakot ang Barako Bull ng 35 points sa kabuuan ng second quarter mula kina Sunday Salvacion, two-time PBA Most Valuable Player Willie Miller, Paul Artadi, Leo Avenido at Danny Seigle kasabay ng paglimita sa Powerade sa 16 markers.
Isinara ng Energy ang third period bitbit ang malaking 90-47 abante kontra sa Tigers.
Dalawang magkasunod na three-point shots nina Avenido at rookie Dylan Ababou at jumper ni Don Allado ang nagpalobo sa lamang ng Barako Bull sa 100-49 sa 9:30 ng final canto.
Ipinoste ng tropa ni Baculi ang pinakamalaki nilang bentahe sa 53 points, 105-52, sa 8:22 sa laro galing sa dalawang freethrows ni rookie Paul Sorongon.
Pinangunahan ni Salvacion ang Energy mula sa kanyang 20 points kasunod ang 16 ni Miller, 14 ni Artadi, 12 ni Avenido at 11 ni Seigle.
Umiskor si Sean Anthony ng 13 markers para sa Tigers.
Nalimita si Gary David sa 5 points matapos kumabig ng game-high 42 markers sa kanilang panalo laban sa Petron Blaze.
Barako Bull 117 - Salvacion 20, Miller 16, Artadi 14, Avenido 12, Seigle 11, Sorongon 7, Ababou 7, Arboleda 7, Pennisi 6, Allado 6, Salvador 4, Peña 4, Gatumbato 3.
Powerade 78 - Anthony 13, Kramer 12, Lassiter 9, Antonio 9, Martinez 7, Vanlandingham 7, Calimag 6, David 5, Casio 4, Lingganay 2, Allera 2, Crisano 2, Cruz 0.
Quarterscores: 27-13; 62-29; 90-47; 117-78.