Caniga andam na moaway didto sa US

CEBU, Philippines - Andam na ang batan-ong Mixed Martial Arts (MMA) prospect nga si Johnlery 'Ian' Caniga sa iyang kampanya didto sa Estados Unidos.

Si Caniga mao lang ang bugtong Pinoy nga moduwa sa Navarro's Mix Martial Arts Championship nga gikatakda karong Nobiyembre 5 didto sa Pacifica sa California, USA.

Migikan na si Caniga kagabii paingon sa Estados Unidos uban sa iyang amahan ug Yaw-Yan ArDigma founder nga si Master Benigno 'Ekin' Caniga Jr. Yaw-Yan ArDigma senior instructor ug Arnis Grandmaster Max Caballes.

Ang 20-anyos nga si Caniga, tinun-an sa University of Cebu (UC) sa kursong BS Criminology mao ang labing unang Sugbuanon nga moduwa’g MMA didto sa Estados Unidos.

Nabantog na ang pangan ni Caniga sa natad sa MMA, kickboxing ug Brazilian Jiu-jitsu dinhi sa nasud diin nikutlo na siya og mga daog sa iyang mga duwa dinhi sa Sugbu ug didto sa kaulohan.

"Paningkamotan gyud nako ug akong ihatag ang tanan, naa tay gamay'ng pressure kay gidala nato ang pangan sa Pilipinas pero sa paningkamot ug pag-ampo suwayan nato pagkuha ang daog," matud pa ni Caniga.

Sa usa ka adlaw nga torneyo, si Caniga moduwa og nagkalain-laing discipline sama sa Brazilian Jiu-jitsu, grappling, muay-thai, wrestling ug arnis.  (BANAT SPORTS)