CEBU, Philippines - Nakasud na gyud sa quarterfinal sa labing unang higayon ang University of San Carlos (USC) spikers human mirehistro og upat ka daog ug usa ang pilde paghuman sa elimination round phase sa men's volleyball tournament sa University Games sa miaging adlaw didto sa Panay Civic Center sa lungsod sa Panay, Capiz province.
Ang USC Warriors ni coach Jessie Yungco nasugamak sa una nilang duwa batok sa mas tag-as nga University of Sto. Tomas (UST) sa upat ka sets, 24-26, 25-18, 25-18, 25-20.
Hinuon, ang USC nakarekober dihang nakamaneho kini pagharos ngadto sa uban nilang kontra.
Ang reigning CESAFI men's champion nakalingkawas batok sa pareho nila'g kalibre nga St. Benilde sa lima ka sets, 23-25, 25-17, 25-20, 26-28, 15-11.
Nakasugat sab sila og lisud nga duwa batok sa Holy Cross Davao City sa upat ka sets, 22-25, 25-18, 25-18, 25-21.
Gipilde sab sa USC sud sa straights ang Colegio dela Purisima Concepcion (CPC), 25-16, 25-17, 25-18.
Ang kadaugan gipangulohan ni Kennith Bensig, Bonvie Estrera, Jerone Maestre, Dennis Sepulveda, Ryan Abut ug Ryan Fuentes.
Nakatampo sab sa kalampusan silang Leon Gaspar, Earvin Gallegos, Junpit Escasinas, Armand Quirol ug Gavinito Yongco.
Ang USC moharong sa Far Eastern University (FEU) sa quarterfinals. (BANAT SPORTS)