CEBU, Philippines - Turno na sab sa Sacred Heart School-Ateneo de Cebu (SHS-AdC) Magis Eagles nga mopakita'g labok sa kampiyonato dihang ilang gipalayas sa ilang trono ang defending champion Cebu Eastern College (CEC) Dragons pinaagi sa pagpilde sa iskor nga 82-76 ug ingon man pag-angkon sa katapusang luna sa finals sa secondary division sa 11th Cebu Schools Athletic Foundation Inc. (CESAFI) basketball event kagabii didto sa nagsugwak nga Cebu Coliseum.
Sa maong kadaugan, ang Magis Eagles maoy nakakuha og katungod sa pakigsangka sa nagpaabot nga University of the Visayas (UV) Baby Lancers sa "best-of-five" championship series sugod ugma.
Ning pagsulat, ang second seed Southwestern University (SWU) Cobras ug third seed University of the Visayas (UV) Green Lancers, padayong nagtigi sa tinaktakay nilang duwa alang usab sa katapusang luna sa finals.
Si Jari Igna maoy topscorer sa Magis Eagles nga midagit og 20 puntos uban ang duha ka krusyal kaayong triples sa himalatyong oras sa duwa nga maoy nakahugno sa paglaum sa Dragons.
Gialalayan sab sa higanteng si Julius Cadavis, kinsa mitusik og 18 puntos, gisundan ni Maverick Suarez sa iyang 11 puntos, samtang si Aaron Sing miposa og tulo ka triples alang sa iyang nuybe puntos.
Si Marvin Bauya, kinsa gitawgan og unsportsmanlike foul tungod sa tinuyo niyang pagdasmag ni Alexander Lim sa katapusang 13.9 segundos human masipyat ang iyang tira, maoy nangulo sa Dragons nga mibugwak og 20 puntos. Si Neil Sumayang miabuno og 19 puntos, samtang si Alfred Sedillo misansan og 12 puntos alang sa Dragons. (BANAT NEWS)