Lancers wa'y kurat, Cobras nagkalat

CEBU, Philippines -  Kung usa ka sa nakasaksi sa semifinal match tali sa University of the Visayas (UV) Green Lancers batok sa Southwestern University (SWU) Cobras kaniadtong Huwebes, Oktubre 20 didto sa nagdasok nga Cebu Coliseum, imong makita nga milutaw gyud ang hataas nga “championship experience” sa Lancers diin kalmado kaayo nilang gipapas ang ilang 12 puntos nga biya, 21-33.

Dili tiaw ang modaug ka og sagunson siyam ka korona sa Cebu Schools Athletic Foundation,Inc. (CESAFI) ug tungod sa kadaghan nilang balik-balik ngadto sa finals sulod na sa 10 ka higayon, nahutdan na sila'g kurat ug wala na sa ilang bokabularyo ang pulong nga “talaw”.

Tungod kay sayo man silang gibiyaan, may igong oras ang Lancers nga mosumbalik nga maoy hinungdan nga wala sila mag-panic sa gamay nga biya. Didto sa kataposang sayis minutos sa fourth period, may posiblidad pang modaug ang Cobras apan sa nahibiling dos minutos, hingpit silang mikolapso ug dili ikalimod nga medyo na-apektohan gyud sila sa pagka-foul out sa usa sa ilang shooters nga si Bonifacio Guillena, Jr.

Imo sad nga himatikdan nga naglikay na nga maoy mabasol ang mga players sa Cobras sa kapildehan ug gani, sa pipila na lang ka segundos ang nahibilin, wala na makasabot si Eleazar Armecin kung unsay iyang buhaton ug imbes siya maoy licensed gunner sa team, didto niya ihatag ang bola kang Rene Pacquiao kinsa maoy mitira’g tres nga dili niya natural nga position isip outside shooter.

Hinoon wala gihapo’y mahitabo bisan og misulod pa ang three-point attempt ni Pacquiao kay modaug man lang gihapon ang Lancers ug tres puntos inay sayis puntos diin ang final score 73-67.

Akong hipanglantawan nga walay kalainan ang umaabot nga duwa ugma diin ipahigayon ang rubbermatch ug kung championship experience maoy atong himoon nga sukaranan, dili makasustenir ang Cobras.

Bugtong dag-anan sa Cobras mao ang pagsikit sa score ngadto sa kataposang dos minutos ug dag-on nila ang duwa sa “lucky break”. Posibleng modaug ang Cobras kung maayo ang ilang ipahamtang nga depensa kay matod pa “offense wins game, defense wins championships”.

Medyo hilaw pa sab og gamay ang ilang 6-6 nga Cameroonian center nga si Justin Aboude ug makita ang iyang immaturity niadtong iyang hansak nga misipyat. Wala sab magsilbe ang depensa nilang Benito Ortuyo ug Joseph Nalos ngadto kang John Michael Abad ug daw bunot nga naglutaw sa dagat silang gibiyaan.

Bisan gani kadtong midaug sila sa second round, ang lucky bounce sa jumpshot ni Aboude maoy nakapalabaw ug nakapadaug apan dili buot pasabot nga usa kadto ka impresibong kadaugan. Kadto hinoong 64-56 nga daog sa first round may tinuoray nga matang sa duwa sa Cobras.

Daghan akong higala nga nagkanayon nga lisod pildehon ang Cobras tungod kay beteranong coach ug maayong laki si konsehal Raul “Yayoy” Alcoseba apan ang nakaparat kay bisan pa og maayo siyang coach, dili man siya maoy nagduwa.

Sa pinilosopo nga panulthion sa basketball, the “ball is round” busa tungod kay wala pa man magsugod ang duwa, lisod sab kaayo pagtag-an apan sa akong gika-ingon sa unahan kung ang duwa ipaagi sa experience, UV ang modaug apan kung ang duwa ari hukman sa lucky breaks. SWU ang modaug pinaagi sa motivation nga ikahatag ni coach Yayoy.

ARENA-7. Karong adlawa, sugdan ang tinuig nga torneyo sa basketball sa mga emplyeado sa gobiyerno nga gitawag og Association of Regional Executives in National Agencies o ARENA dinhe sa Region 7.

Usa sa teams nga mosalmot mao ang Bureau of Customs ubos sa bag-o nilang coach nga si Gilbert Demape. Matod pa sa bana sa akong ig-agaw nga si Dione Edera, adunay 14 ka teams nga mosalmot ug nakahukom karon ang BOC nga magpalig-on ubos ni coach Demape sa panghinaut nga mo-abante sila sa Top 4.

Kanunay akong makakober sa AREANA-7 sa miaging mga katuigan apan mas kadaghan matagak ang BOC kay sa mo-abante sa sunod round. Karon, usa na ka star-studded team ang BOC ubos ni District Collector Atty. Ronnie Silvestre ug team consultant Rady Abarintos, ang hepe sa Cash Division. (BANAT NEWS)