Trillanes midayeg sa mga pinoy athletes

CEBU, Philippines -  Gisagop sa Senado ang Resolution No. 579 nga nagdayeg sa mga estudyanteng Pinoy athletes, kinsa misalmot sa miaging Summer Universiade didto sa Shenzhen, China nga naglakip sa University of Cebu (UC) Webmasters, ang no. 1 semifinalists sa nagpadayong Cebu Schools Athletic Foundation, Inc. (CESAFI) diha sa Cebu Colliseum.

Ang maong resolusyon gipasaka ni Senator Antonio 'Sonny' F. Trillanes IV aron pag-ila sa dedikasyon ug sakripisyo nga gihimo sa mga Pinoy athletes diin ang katuyoan mao ang paghatag og dungog sa atong nasud.

Ang Universiade nga giila sab nga World University Games usa ka international biennial sports nga pagahimuon matag duha ka tuig. Mikabat ngadto sa 10,603 ang misalmot sa maong torneyo gikan sa 151 ka nasud ug 94 niini ang mga Pilipino. Gipahigayon kini niadtong Agosto 12-23 diin may 306 ka events gikan sa 24 ka sports disciplines.

Ang Federation of School Sports Association (FESSAP) maoy mi-sponsor sa mga Pinoy athletes pagsalmot sa Universiade nga gi-sanction sa International University Sports Federation (FISU).

Ang Philippine Team misalmot sa siyam ka events nga mao ang swimming, men’s basketball, table tennis, taekwondo, badminton, chess, archery, beach volleyball ug athletics. (BANAT NEWS)