Donaire Dominante

CEBU, Philippines -    Milampos si Nonito “The Filipino Flash” Donaire sa pagdepensa sa iyang WBC ug WBO title batok ni Omar Narvaez sa Argentina sa usa ka dominante nga unanimous decision nga kadaugan kagahapon didto sa Madison Square Garden sa New York.

Apan adunay pipila ka mga boxing personalities ug fans ang dismayado human wala mahitabo ang gipaabot nilang knockout nga kadaugan ni Donaire batok sa beteranong si Narvaez.

Sa labing una ug posibling katapusan niyang bantamweight title defense, mipasulabi ang kusug ug kaabtik ni Donaire batok ni Narvaez, apan pakyas siya dihang nagmakuli pakigsinukliay og kumo ang Argentinean ug nagpunay nalang og cover.

Human sa dose ka rounds, layu kaayo og labaw si Donaire sa scorecards sa tulo ka judge nga pulos miiskor og 120-108.

“It was disappointing to fight somebody like that,” tug-an pa ni Donaire human sa away. “He’s a veteran, but he didn’t come to fight this time.”

Giangkon ni Donaire nga gibuhat niya ang tanan aron himuong kulbahinam ang away, apan nadismaya siya dihang bugtong siya lang ang kanunay nga milabay og kumo, samtang nagsige nalang og sagang ang iyang kontra.

Nangayu hinuon og despensa si Donaire sa iyang mga fans tungod sa pagkapakyas niya paghimo og knockout. “I did my best,” matud pa niya. “I’m sorry that it didn’t come out the way we wanted.”

Hinuon, bisan pa og wa siya matagbaw sa iyang daog, giklaro ni Donaire nga desidido gihapon siya nga mobiya na sa bantamweight division ug musaka sa 122 lbs. division.

“We want somebody who can fight, we want somebody who’s willing to go out there. We want somebody that will risk their belts and their chin,” dugang pa ni Donaire.

Si Top Rank Inc. CEO Bob Arum mitug-an nga anaa sa iyang lista aron sangkaon ni Donaire ang mga title-holder sa super bantam nga sila si legendary Mexican Jorge Arce ug Japanese champion Toshiaki Nishioka.

White team midaog batok sa REd team

Literal nga gilubdan sa White Team (Blackwater) ang Red Team (Uy Network) pinaagi sa pagkulit og 55-47 nga kadaugan sa nagpadayong elimination round sa Power Dealer Basketball Club (PDBC)-2011, Inter-Color basketball tournament kaniadtong Sabado sa gabii didto sa Sacred Heart School covered court sa dan Gen. Maxilom avenue, ning dakbayan.

Ang White kinsa mao na karo’y solo leader sa ilang 4-1 nga baraha, sayong naka-una pinaagi sa ilang 19-10 nga labaw, maoy nagkontrolar sa duwa hangtod na didto sa halftime, 31-19 tungod kay wala kapugngi si Marcial Fernandez kinsa miposa og 15 puntos aron pagtimon sa ilang kadaugan. 

Gawas kang Fernandez, miamot sab og 14 puntos si Canjo Fernandez samtang si Clint Suelto maoy nangu sa Red sa iyang 17 puntos ug silang Fred Vitug ug Jomer Mejias nagkumboya og 24 puntos.

Sa ikaduhang duwa, ang Yellow Team nga gipaluyohan sa Royale Power Dream ubos sa ilang captain ball nga si Arnold De Asis, milatos sa Green Team nga gi-sponsoran sa Natasha/MSE Patriots, 69-39. Ang maong resulta maoy labing dako nga winning margin sa kasamtangan torneyo aron inaton ang ilang baraha ngadto sa 4-2 ug nakigtabla sa Red Team.

Igo lang naglabaw og gamay ang Yellow sa sayong bahin sa duwa apan nagmangtas sila didto sa fourth period diin nagpabuhagay sila’g 24-6 nga scoring run aron pagkulit sa 30 puntos nga masaker.

Silang Joy Logronio ug De Asis maoy nangu sa Yellow sa ilang 18 ug 17 matag usa uban sa pag-abag ni Andrew De Gracia kinsa miamot og 13 puntos.

Silang Sim Tabique ug Skye Mercado maoy nangu sa opensa sa Green sa ilang 15 ug 12 puntos matag usa.

Puntos matag usa:

First Game:

WHITE (55)- M. Fernandez 15, C. Fernandez 14, Gonzaga 8, Bonifacio 6, Antipuesto 5, Cavan 3, Abellana 2, Romares 2.

RED (47)- Suelto 17, Mejias 12, Vitug 12, Pepito 2, Dolino 2, Uy 2.

Second Game:

YELLOW (69)- Logronio 18, De Asis 17, De Gracia 13, Saballa 5, Vergara 4, Angcay 4, Espina 3.

GREEN (39)- Tabique 15, Mercado 12, Jacob 6, Andugo 2, Bernaldez 2, Horales 2.(GGM) (BANAT NEWS)