Jakosalem mipirma' fight contract uban sa ALA Boxing

CEBU, Philippines - Namunga ang paningkamot sa Boholano boxer nga si Romeo 'Jako' Jakosalem dihang gipapirma siya'g fight contract sa   ALA Boxing Promotions.

Miabot ang break ni Jakosalem dihang usa siya sa napilian nga moaway sa undercard sa Pinoy Pride series batok ni Steve 'Dragon' Clagget niadtong Marso didto sa Waterfront Cebu City Hotel. 

Ang maong away giisip nga "Fight of the Year" sa Philippine boxing kay isog nga naghilam-osay og mga kumo ang duha.

Naglabaw sa scorecards si Clagget, apan mihimo og usa ka milagro si Jakosalem dihang iyang gi-TKO sa 1:28 sa final round ang bisitang boksidor.

Gikan didto sunod-sunod ang gihatag nga away sa ALA Promotions ngadto ni Jakosalem diin ang katapusan mao ang iyang first round KO batok ni Eusebio Baluarte aron pagsakmit sa Philippine light welterweight title.

Si Jakosalem mobalik og saka sa ring sa Disyembre 10 sa undercard sa "Pinoy Pride 10" ug iyang sangkaon ang Koreano nga si Pan Soo Kim alang sa OPBF title.  (BANAT SPORTS)