Akira hari sa Aloguinsan Mayor's Cup

CEBU, Philippines - Nagkumboya og 43 puntos sila si Enrico Llanto ug kanhi PBA cager Jimwell Torion aron pangulohan ang Akira/Metrotiles nga milubong sa Inner G Capsules, 90-77 ug aron usab sakmiton ang korona sa Aloguinsan Mayor’s Cup basketball tournament niadtong Domingo didto sa Alodome sa Aloguinsan.

Human magtabla, 43-all sa halftime, napukaw ang Akira aron molabaw og daku ug wala na makaapas pa ang Inner G sa pagpangulo nilang Kurt Amores, John Malinao ug Lyndon Gudez.

Gawas sa mga dominanteng sentro nga silang Llanto ug Franklin Nailon, ang Akira mikuha sab sa serbisyo sa laing ex-pro nga si Dale Singson aron mosuporta ni Torion sa backcourt.

Ang Akira niuli bitbit ang P100,000 nga ganti, samtang ang Inner G nakadawat og P70,000.

Si Jirvel Espina maoy nangu sa Inner G sa iyang 13 puntos.

Sa sayo pa, ang   Carmen Copper Corporation (CCC) Builders midaog batok sa Charmy Marketing, 105-102 aron pagsakmit sa ikatulong puwesto.

Si Alex Cainglet maoy nangu sa CCC Builders sa iyang 29 puntos ug si Rene Toring miposa og 25 puntos. Si Danny Aying miabuno og 19 puntos ug si Sherwin Abobo mihakot og 15 puntos.

Ang ex-USPF Panther forward nga si Elvis Labares maoy nangu sa opensa sa Charmy sa iyang 24 puntos samtang sila si Ronan Isidro ug Troy Mercader mi-iskor og 18 ug 17 puntos, matag usa.

Ang Inner G mibulsa og P70,000, samtang ang CCC Builders miangkon og P50,000.

Ang torneyo nahimong posible tungod sa pagsuporta ni Aloguinsan Mayor Chonse Moreno ug Vice Mayor Cynthia Moreno. Si councilor Toto Biton nagsilbe isip commissioner uban ni Edwin Dejacto isip chief sa technical committee.

PUNTOS MATAG USA

Unang duwa:

CCC (105) - Cainglet 29, Toring 25, Aying 19, Abobo 15, Colegado 9, Aldave 4, Redulosa 2, Moltalbo 2

Charmy (102) - Labares 24, Isidro 18, Mercader 17, Akad 9, Nuñez 8, Pogoy 8, Arnado 5, Delos Santos 4, Sereño 3, Mendarus 3

Ikaduhang duwa

Akira (90) - Llanto 23, Torrion 20, Abadia 18, Caputolan 8, Galinato 7, Capangpangan 6, Guangco 6, Singson 4, Nailon 2

Inner G (77) - Espina 13, Gudez 11, Delfino 11, Malinao 10, Amores 9, Omolon 9, Villaver 8, Saguindel 6   - (BANAT NEWS)