Philadelphia sixers gibaligya na

CEBU, Philippines - Aprubado na sa mga NBA Board of Governors ang pagbaligya sa Philadelphia 76ers ug paliton na kini sunod semana.

Ang pagbaligya sa 76ers gitugotan sa miaging semana ug ang bag-ong tag-iya niini mao na ang New York-based ug inilang buyout specialist nga si Joshua Harris kinsa mao nay magkontrolar sa franchise.

Matapos na sab unya ang 15 ka tuig nga pagdumala sa Comcast-Spectacor sa 76ers nga naglakip ug usa ka NBA finals sa panahon ni Allen Iverson.

Ang Comcast-Spectacor nga gipangulohan sa ilang chairman nga si Ed Snider, maoy mipalit sa Sixers gikan kang Harold Katz kaniadtong Abril 24,1996. Ang Comcast-Spectacor mao sab ang nanag-iya sa Philadelphia Flyers sa NHL.

Gipalit ni Harris ang Sixers sa kasamtangan nga NBA lockout. Ang unang duha ka semana sa umabot nga regular season gikanselar na.

Si Harris maoy usa sa tulo ka founders sa Apollo Global Management, usa ka alternative investment manager. Siya maoy nangu sa usa ka grupo nga naglakip sa kanhi NBA player agent ug Sacramento Kings executive nga si Jason Levien.

Ang Sixers gibana-abana sa Forbes Magazine nga mobalor og $330 million, ang ika-17 nga labing adunahan nga team sa kinatibuk-ang 30 ka teams sa NBA.

Aduna sab sila’y kontrata sa television nga Comcast SportsNet hangtod na sa 2029.

Si Harris nagsugod sa Apollo Global Management kaniadtong 1990. Aduna siya’y bachelor’s degree gikan sa University of Pennsylvania’s Wharton School of Business ug adunay master’s degree gikan sa Harvard Business School.

Ang iyang grupo maoy mamalitay sa mga teams nga wala modaug og korona sukad pa sa tuig 1983.

Ubos sa pagpanag-iya ni Snider, ang Sixers mi-abante sa NBA finals apan napilde sa Los Angeles Lakers niadtong 2001.  - BANAT NEWS