Akira/Metrotiles, laing duha miabante sa 2nd Aloguinsan Mayor's Cup

CEBU, Philippines - Gilampaso sa title-favorite Akira/Metrotiles ang Gerongco Lumber, 90-70 aron moabante sa semifinals sa Open division sa nagpadayong 2nd Aloguinsan Mayor’s Cup basketball tournament niadtong Sabado didto sa Alodome,lungsod sa Aloguinsan, Cebu.

Gipakita gihapon ni ex-pro Jimwell Torion nga aduna pa siya’y igong katakus nga motimon sa team dihang ilang gipuhalan ang tandem nilang Juntilla ug Ronaldo Bucao.

 Niadtong Domingo ubos sa Inter-Company division, gitaktak sa Charmys ni team owner Amy Lauron ang ACES ni coach Al Solis pinaagi sa pag-iskor og 97-80 nga kadaugan, samtang gilubong sa Carmen Copper Corporation Inc. (CCC) ang Angilan Destroyers, 113-89 aron moabante sab sa semifinals.

Ang semifinals himuon karong Sabado diin magbagat ang Akira ug Charmys, samtang ang Carmen Copper moharong sa Inner-G Capsules. Ang modaog mag-abot sa finals.

Ang torneyo gipaluyohan ni Mayor Chonse Moreno, Vice Mayor Cynthia Moreno ug sa tanang konsehales sa Aloguinsan ubos sa ilang sports committee chairman Mariolito 'Toto' Biton.  (BANATSPORTS)