CEBU, Philippines - Upat ka mga fighters sa Yaw-Yan ArDigma ang milampos pagdispatsar sa tagsa-tagsa nila ka mga kaatbang sa 2nd Redneos Iron Gladiator Muay-Thai qualifying match sa miaging adlaw didto sa Talisay City Park.
Ang mga batos ni Yaw-Yan ArDigma founder Master Benigno 'Ekin' Caniga Jr. pulos mi-iskor og knockout nga kadaugan.
Ang Universal Reality Combat Championship (URCC) fighter Mark 'Buhawi' Revalde nangulo sa mga ArDigma boys human niya gipaundang si John Edu 'Excalibur' Torbiso sa oras nga 1:15 sa second round.
Gigamit ni Revalde ang iyang nagpungasi nga mga patid ug agresibong ground game aron dabodabohan si Torbiso.
Ang undefeated nga si Renan 'Limbas' Noblefranca mipakamang ni Joselito 'Kasag' Bellaniso sa Sukmag Patid Ciniad Club sa second round pinaagi sa brutal spinning back fist.
Gipukan usab ni Roel 'Akiyama' Rosauro si Anthony Bellaniso, samtang si Earl 'Budoy' Surigao mipahagsa ni Freddie Gallarde sa Black Skull Street Fighter.
Si Jhonjer 'Dangerous' Torbiso sa Durex Dragon pakyas paghipos og daog human gilupig ni James 'Shotgun' Roiles sa Redneos Iron Gladiator pinaagi sa "unanimous decision."
Mikompleto sa resulta sa mga midaog mao ang stablemate ni Roiles nga si Shaun 'Australian Bear' Jeffrey, kinsa mikulata ni Carlo Ventic, samtang si Roger Modesto midaog batok ni Araine Castro.
Bugtong nakalusot sa mga fighter sa Durex Dragon mao si Axel Torbiso, kinsa midesisyon ni Jereboy Dela Vega sa ATC Club. - BANAT NEWS