CEBU, Philippines - Mikabkab og 30 puntos ang gamitoy nga shooting guard nga si Gerald Ampoon uban sa iyang unom ka triples samtang mihagdaw og 35 puntos ang 6-9 nga sentro nga si June Mar Fajardo kinsa migamit sa iyang gitas-on aron tabangan pagbaswat ang defending champion University of Cebu (UC) Webmasters ngadto sa makutas apan tam-is nga 95-89 nga kadaugan batok sa Cebu Institute of Technology-University (CIT-U) Wildcats atol sa nagpadayong 11th Cebu Schools Athletic Foundation, Inc. (CESAFI) basketball season didto sa Cebu Coliseum.
Biya og 14 puntos pagsugod sa fourth period, 61-75, dali kining gipapas sa Webmasters pinaagi sa paggamit og 22-5 scoring run sa wala pa nila hingpit dabudabohi ang Wildcats aron ma-outscore sa 34 -14 sa kinatibuk-ang fourth period.
Nasumpo sa hingpit ang dautang laraw sa Wildcats dihang nagsugod na og wadwad si Fajardo diin iyang gigamit ang iyang gitas-on aron pag-abug sa Wildcats kinsa daan nang nasayud nga delikado ang ilang kahimtang tungod kay sayo kaayo silang na-penalty ug wala sila'y gitas-on nga ikatugbang ni Fajardo kinsa nagkumbira og puntos sa undergoal.
Apan bisan pa’g ilang gipakita ang ilang kalig-on sa depensa, padayon gihapong nagmangtas ang Wildcats hangtod nga nasumpo kini didto na sa kataposang kuatro minutos dihang mibahug og sagunson singko puntos si Ampoon aron masakmit ang labaw, 83-82 ug dayon, ang iyang ikalimang triple maoy naghatag kanila’g 88-87 nga abante may 2:10 ang oras sa fourth quarter ug sa kataposan, ang iyang ika-unom nga three-pointer maoy nag-inat sa ilang labaw ngadto sa 95-89 nga bentaha sa nahibiling 24 segundos sa duwa.
Wala man tuod makahuygo si Robinson Mohammad apan nabawi kini dihang miamot og 13 puntos si Edward Pao ug bisan wala kaayo makapuntos silang Brian Quinton Huruela ug Luigi Bercede, nakatabang sila sa depensa.
Aduna nay 10 nga baraha sa kasamtangan ang Webmasters ug segurado na silang makakuha’g twice-to-beat advantage bisan unsa pay mahitabo sa ilang prestige match batok sa Southwestern University (SWU) Cobras karong Huwebes.
Si Allan Dimco maoy nangu sa 1-11 nga Wildcats sa iyang 28 puntos.
Sa laing bahin, gitapos sa University of the Visayas (UV) Baby Lancers ang double round elimination isip topseed human ilang gipukan ang Sacred Heart School-Ateneo de Cebu (SHS-AdC) Magis Eagles sa iskor 96-91 apan nag-agi una kini ug diha ka overtime.
Puntos matag usa:
First Game:
UV (Jrs.) 96— Desiderio 34, Lucero 13, Peralta 11, Ugsang 8, Undaloc 7, Oche 6, , Delos Santos 5, Dennison 3, Calumpang 3
SHS-AdC (Jrs.) 91— Ochea 23, Asilum 19, Cadavis 14, Suarez 11, Go 8, Igna 7, Yu 5, Segador 4
Second Game:
UC (Srs.) 95— Fajardo 35, Ampoon 30, Pao 13, Bercede 7, Caytuna 5, Mohammad 3, Heruela 2
CIT-U (Srs.) 89— Dimco 28, Taboada 19, Batiquin 13, Curso 10, Taghoy 8, Rabaya 6, Sanchez 5 Halftime: 39-49. - BANAT NEWS