Pacquiao dili No.1

CEBU, Philippines - Miisa ang kilay sa mga boxing fans dihang migawas ang labing uwahing pound-for pound rating sa boxrec.com diin dili si Pinoy boxing superstar Manny Pacquiao ang number one boxer, apan ang karibal niini nga si Floyd Mayweather Jr.

Sa rating sa boxrec.com, usa sa mga sikat nga boxing website sa kalibutan, si Mayweather miani og 1,650 points itandi sa 1,437 nga natigom ni Pacquiao.

Miani og pagsaway ang maong rating tungod kay lahi kini sa tulo ka world pound-for-pound ranking sa Ring Magazine, Yahoo! Sports ug ESPN diin pulos mihatag ni Pacquiao sa numero unong dapit.

Gawas sa isyu sa No.1 pound-for-pound, wala usab naapil sa rating sa boxrec.com si bantamweight king Nonito Donaire Jr. Kinsa maoy No.4 best fighter sa Ring Magazine.

Dili sama sa ubang ranking sa mga boxing website, ang boxrec.com migamit og computerized points-based system diin makadawat og puntos ang usa ka sikat nga boksidor basi sa ilang professional record.  - BANAT NEWS