Kenyans nangharos sa 3rd Gullas Run

CEBU, Philippines - Managhigalang Kenyans nga sila si Josphat Too ug Abraham Missor maoy nidominar sa tagsa-tagsa nila ka dibisyon sa 3rd Gullas Run kagahapon didto sa South Coastal Road sa Talisay City.

Si Too maoy miangkon sa titulo sa 10K men’s, samtang si Missos sa 5K run. 

Gitapos ni Too ang 10K run sa oras nga 32:47.18. Si Robert Daang mitapos sa ikaduha sa oras nga 35:46.75, samtang si Riez Enriquez mipuwesto sa ikatulo uban ang 35:48.70 nga oras.

Wala usab magbasol si Missos sa paghatag og higayon ngadto ni Too kay iyang giangkon ang titulo sa 5K human niya gitapos ang lumba sa oras nga 16:16.53 batok nila ni Rony Andrin    (17:43.86) ug Harold Estrada (17:59.73) nga mi-okupar sa ikaduha ug ikatulong dapit.

Sa 10K women’s, ang Milo marathon Cebu leg third placer nga si Mary Jane Beboso maoy reyna sa lumba sa oras nga 42:51.22, gisundan ni Jojielyn Mae Pepito (44:34.86) ug Marichu Luterte (45:07.01) sa ikaduha ug ikatulong dapit.

Gihakop sa managsuong Jean ug Lovely Fe Andrin ang unang duha ka luna sa women's 5K. Si Jean mitapos sa dagan sa oras nga 21:05.28, samtang si Lovely Fe mi-oras og 21:07.10. Si Babiemeryn Obrero nga mi-oras og 24:01.36 maoy mikapyot sa ikatulo.  (BANATSPORTS)