Century Properties Ultramarathon 2011 andam na

CEBU, Philippines - Plansado na ang Century Properties Ultramarathon 2011 nga gitakda karong Nobiyembre 19 gikan sa Bogo paingon dinhi sa siyudad sa Sugbu.

Ang umaabot nga 100 kilometro nga lumba magsilbe usab nga fund raising event ug usa sa mahinungdanong katuyoan niini mao ang pagluwas sa Pasig river.

Kay ang main sponsor sa maong kalihukan nga Century Property, mipasalig nga modonar og P1 million alang sa rehabilitation sa Pasig River pinaagi sa ABS-CBN Foundation's Kapit Bisig Para Ilog Pasig kun ang numero sa mga partisipante sa umaabot nga aksiyon sa Cebu ug sa Davao karong Disyembre 10 makaabot og 100 o kapin pa.

Seguro na ang P400,000 nga mahatag sa nahisgutang foundation atol sa Run for Pasig River karong Nobiyembre 20, samtang ang kulang nga P600,000 idonar kun ang target number sa mga entrante sa Cebu ug Davao leg matuman.

"We want to bring forth the message of preserving the river and all water resources in the country through this event," matud pa ni Maria Theresa Fucanan-Yu, AVP for Corporate Communications atol sa paglusad sa maong kalihukan kagahapon.

Gawas sa Pasig River, ang Century Property laraw sab mosuporta sa rehabilitasyon sa water resources sa nasud.

Tungod niini, ang organizing FrontRunner Magazine, nagdasig sa mga Sugbuanon ug sa uban sa pagsalmot ning kalihukan alang sa mapuslanong katuyoan.

Alang sa registration ug mga pakisayod, mahimong tawagan si Raffy Uytiepo sa 0906-2905052 o di ba Jonel Mendoza sa 0922-8229342 or email sa [email protected] o Runnr sa Ayala Center-Cebu. (BANATSPORTS)