Asenjo mipaundang ni Tadena

BACOLOD CITY, Philippines  -- Nagtusaktusak nga solidong bodyshot ang gihimong hinagiban ni Rommel 'Little Assassin' Asenjo aron pasurendiron pagsugod sa ikaunom nga round ang beteranong si Arnel Tadena sa main event sa Cobra Energy Drink-ALA Promotions Fight Night sa miaging gabii didto sa Chinatown 888, ning siyudad.

Ang former world title challenger nga si Asenjo mipakita sa iyang kaagresibo sa tibuok away. Si Tadena, kinsa wala na makaantos sa gihimong pagkastigo ni Asenjo, wala na mibarog sa iyang lingkoranan ug napugos pagsurender sa dayong sixth round.

Ang maong kadaugan maoy misugat sa pagbalik og away ni Asenjo gikan sa iyang sakit nga kapildihan ngadto ni Raul Garcia atol sa ilang WBO minimumweight title fight niadtong Abril didto sa Mexico.

 Si Asenjo mirehistro sa ika-20 niyang daog, 17 niini gikan sa knockout uban ang tulo ka pilde, samtang ang Bol-anon nga si Tadena adunay 11 ka pilde sa 28 niya ka mga away.

Sa supporting bout, si Gil Melligen midaog pinaagi sa "unanimous decision" batok ni Rufino Mante. Bisan pa sa duha ka point deduction nga gipahamtang ngadto kaniya sa referee tungod sa low-blow ug headbutt, mipatigbabaw gihapon si Melligen sa scorecards sa tulo ka hurado, 97-91, 95-93 ug 98-90.

Milampos usab ang Mandauehanon nga si Wilbeth Loberanis human sa iyang dominante nga performance batok ni Roger Echavez aron mokulit og "unanimous decision" nga kadaugan sa walo ka hugna nga away.

Ang manghod ni Melligen nga si Rey, mitumba ni Tata Ramuga sa third round, samtang si Rocky Bacor midaog pinaagi sa "unanimous decision" batok ni Jonathan Ricablanca ug si Lendel Rosduc midaog batok ni Jacklord Cepeda.

Ang ikatulo ug kinamanghurang Melligen nga si John Rey midaog sa iyang debut fight batok ni Toto Abing pinaagi sa "majority decision." (BANATSPORTS)