Lanete, Semerad ng Bedans kapwa nahirang na NCAA PoW

MANILA, Philippines - Sa panahong nala­gay sa foul trouble ang ka­nilang malalaking pla­yers ay sumandal ang nagde­depensang San Beda sa kanilang mga shooters para okupahan na ang ikalawa at huling twice to beat sa pa­mamagitan ng 84-68 pa­nalo sa Letran nitong Biyernes sa 87th NCAA men’s basketball.

Nakitaan ng pinakama­gandang laro sa taon si Anthony Semerad sa kanyang 16 puntos, kasama ang 11 sa huling yugto pero ang tunay na nagpasikat sa kabuuan ng labanan ay ang beteranong si Garvo Lanete.

Tumapos si Lanete tag­lay ang 28 puntos bukod sa tatlong tres at siyang gumawa nang unti-unting nilayuan ang Knights sa second period.

“He’s really a big time player,” wika ni Lions coach Frankie Lim sa ginawa ni Lanete.

Ang panalo ay ika-15 panalo sa 17 laro ng Lions para pormal na kunin ang insentibo at ang Knights ay nalaglag sa ikatlong puwesto nang tapusin ang double round elimination sa 14-4 baraha.

Sa ipinakita ni Lanete ay hinirang siya bilang ACCEL/3XVI NCAA Press Corps Player of the Week na handog din ng Gatorade.