Caniga moduwa MMA sa US

CEBU, Philippines -  Ang Sugbuanong Mixed Martial Arts (MMA) prospect nga si Johnlery 'Ian' Caniga mosuway pagbutang sa Sugbu sa mapa sa kalibotan sa MMA sa iyang pagsalmot sa Navarro’s Mixed Martial Arts Championship sa Nobiyembre 5 didto sa Pacifica sa California.

Si Caniga, 20-anyos ug tinun-an sa University of Cebu sa kursong BS Criminology mao ang labing unang Sugbuanon nga moduwa'g MMA didto sa Estados Unidos.

 Ang anak ni Master Benigno 'Ekin' Caniga Jr., founder/CEO sa Yaw-Yan ArDigma nga si Johnlery dili kabintahaan sa abilidad kay hanas na kini sa MMA ug Brazilian Jiu-jitsu. Nakahipos na sab kini og mga daog sa iyang mga duwa dinhi sa Sugbu ug didto sa kaulohan.

Atol sa press conference sa miaging gabii didto sa Yaw-Yan ArDigma Gym nga nahimutang sa 4th floor sa Coast Pacific Downtown Center, Sanciangko St., gipadayag ni Caniga ang iyang kaandam ug pasalamat sa kahigayonan nga moaway, dili lang sa iyang kaugalingon, apan alang sa tibuok nasud.

Si Caniga moduwa sa maong usa ka adlaw nga torneyo sa nagkalain-laing discipline sama sa Brazilian Jiu-jitsu, grappling, muay-thai, wrestling ug arnis.

“Pasalamat gyud ko ani nga chance ug maningkamot gyud ko ron sa akong practice para ma-ready akong kaugalingon kun unsa man ang mga away nga akong atubangon didto sa US,” matud pa ni Johnlery

"Salig sad gyud ko ni Ian kay nakita nako ang iyang ensayo, daku kaayo og chance and lets see if pila ka duwa among madaog didto," segun pa ni Master Ekin.

Mokompleto sa team ni Caniga nga molarga didto sa US karong Oktubre 28 mao si Yaw-Yan ArDigma senior instructor ug Arnis Grandmaster Max Caballes. (BANAT NEWS)