Warriors sud sa semis

CEBU, Philippines - Giihaw sa University of San Carlos (USC) Warriors ang mangtas nga University of Southern Philippines Foundation (USPF) Panthers, 71-67 aron mokompleto sa semifinal cast sa collegiate division sa 11th Cebu Schools Athletic Foundation Inc. (CESAFI) basketball event niadtong Domingo sa gabii didto sa Cebu Coliseum.

Gitapos sa Warriors ang double round robin eliminations bitbit ang 7-5 nga baraha aron makuha ang ikaupat nga luna sa semis. Ang ikaduhang luna ilogan sa University of the Visayas (UV) Green Lancers (7-2) ug Southwestern University (SWU) Cobras (7-3). Mahibaw-an kini human sa ilang sangka karong Oktubre 9 diha gihapon sa Cebu Coliseum.

Sila si Cid Cortes ug Robert Gines Codilla mi-iskor og krusyal nga free throws aron tabangan ang Warriors pagselyado sa kadaugan, apan ang katapusang duha ka free throws ni Michael Cantonao sa katapusang 7.8 segundos maoy miselyado sa daog.

Ang Warriors na-outscored sa Panthers sa third period, 26-18, apan namintinar ang nipis nilang labaw sa tibuok fourth quarter hangtod nga si Ed Christopher Cabahug mitabla sa iskor, 62-all sa katapusang tres minutos sa duwa. Si Fritz Dajalos mitabla sa katapusang higayon, 64-all sa nahabiling dos minutos sa duwa.

Daku pa unta’g higayon nga modaog ang Panthers kay igo lang kini nabiyaan og usa ka palito, 66-67 sa nahabiling 1:05, apan pakyas tungod kay misipyat si Dajalos sa iyang duha ka free throws.

Ang Panthers, kinsa moharong sa UV Lancers sa ilang katapusang duwa sa elimination round, natagak na sa semifinal race nga adunay 4-7 win-loss record. Gisugdan nila ang season uban ang 3-0 record, apan napilde sa ilang sunod nga tulo ka mga duwa. Igo lang sila nakahipos og usa ka daog sa second round.

Si Cantonao maoy nangu sa Warriors sa iyang 15 puntos samtang sila si Cortes ug Giovanni Padillo parehong miposa og 14 puntos ug si Hermosa midugang og 10 puntos.

Miburak og 20 puntos si Dajalos alang sa Panthers ug si James Ferraren midugang og 15 puntos.

Sa secondary matches, ang USPF Baby Panthers midaog batok sa USC Baby Warriors, 73-70, gipanitan sa UV Baby Lancers ang DBTC Greywolves, 108-63 ug ang CEC Dragons mibuntog sa USJ-R Baby Jaguars, 86-76. (BANAT)