Emilmich vs. Glenzen sa MKBC finals

CEBU, Philippines -  Gipatapsingan sa Emilmich nilang Michael ug Emily Badon ang Doña Maria Village (DMV) pinaagi sa pag-iskor og 105-104 nga kadaugan sa overtime aron mo-abante sa finals sa nagpadayong Mawin's Kitchen Basketball Cup (MKBC)-2011 Second Conference basketball tournament kaniadtong Martes sa gabii didto sa Vicente Sotto Memorial gym sa barangay Punta Princesa, ning dakbayan.

Ang Emilmich makigsangka batok sa Glenzen Urethane Paints ni businessman Ronel Tiu kinsa maoy misakmit sa ikaduhang luna sa finals dihang ilang gilampurnas ang defending champion Mawin's Kitchen nilang team owners Sherwin Lequit ug Maia Adriatico,91-78 sa usa ka come-from-behind nga kadaugan. Tungod kay dili makadawat si Lequit sa kapildehan, mi-walk-out sila sa kataposang usa ka minuto.

Nag-una ang Emilmich sa first period, 21-16 pinaagi sa mga tirada nilang Beboy Potencioso ug Jumel Lanutan apan mi-rally ang DMV sa second period aron molabaw sa halftime, 41-38. Laing rally sa DMV mi-inat sa ilang labaw ngadto sa otso puntos, 69-61 pagsugod sa fourth period.

Sikit kaayo ang kinatibuk-ang fourth period diin nagsige og banos-banos og labaw ang duha ka habig ug kanunay sab nagtabla hangtod nga gitabla kini ni Oliver Sanoy kinsa kalmado kaayong mipasulod sa iyang duha ka free throws sa kataposang 13 segundos aron ihatod ang duwa ngadto sa overtime sa parehong 88 puntos human sa regulation.

Nahimong bayani si Niño Iso sa Emilmich dihang nakahimo siya'g krusyal nga three-point play alang sa usa ka palito nga kadaugan.

Miposa og 22 puntos si Beboy Potencioso alang sa Emilmich ug si Ver Sonsona midugang og 20 puntos. Pulos sab mibahug og double figures silang Jun Llenes, Lanutan ug Iso samtang si Sanoy maoy nangu sa DMV sa iyang game-high 37 puntos.

Sa laing bahin, gipangulohan nilang Aikan Cabañero ug Yokyok Alesna ang Glenzen ug naglawing na ngadto sa tataw nga kadaugan ang Painters may usa ka minuto na lang ang nahibiling oras sa duwa apan nakakita og pasangil si Lequit ug iyang gipasanginlan ang referee nga wala mohatag og konsiderasyon sa usa ka shot-clock violation. (BANAT NEWS)