Talisay Kickboxing Okt. 9

CEBU, Philippines -  Manglupad na usab ang kumo ug patid diha sa syudad sa Talisay sa ipahigayung 2nd Redneos Iron Gladiator’s Muay-Thai Qualifying match sa Oktubre 9 sa Talisay City Park.

Magsangka sa main event ang pambato sa Torfecma Philippines nga si Resley Arafol batok sa Australiano nga si Shaun Jeffrey sa Redneos Iron Gladiator’s Mixed Martial Arts Foundation sud sa lima ka round sa heavyweight division.

Sa supporting bout, atubangon ni James Roiles sa Redneos ang kickboxer sa Durex Dragon KBC nga si Junjer Torbiso, samtang magpinaksitay usab ang stable mate ni Roiles nga si Gil Montesclaros batok ni Jesus Lasola Jr. sa Torfecma.

Aduna usay dugang 10 ka under card bouts nga bidahan sa mga fighter sa Team Yaw-Yan Ardigma ug uban pang kickboxing stable sa Sugbo.

Libre ang maong kickboxing event alang sa mga lumulupyo sa Talisay. Sugdan ang maong fight card sa alas-9 sa buntag. (BANAT NEWS)