CEBU, Philippines - Mga langyaw ang midominar sa bag-o lang natapos nga Cebu leg sa 35th Milo Marathon National finals nga gisalmotan sa kapin 19,000 ka mga runners kagahapon sa buntag diha sa Cebu City Sports Center.
Ang mga Ethiopians nga mituyo pa pagbisita sa Cebu alang sa Milo Marathon nga sila si Mikael Tesfaye ug Genet Agtew maoy nag-una sa tagsa-tagsa nila ka kategoriya sa 21k division.
Si Tesfaye maoy nag-una sa 21k men’s sa oras nga 1:09.33, gisundan sa laing Ethiopian nga si Mailermariam Kansay sa ikaduhang dapit sa oras nga 1:09.37.
Mipwesto sa ikatulo ang Kenyan nga si Josphat Kiptanji sa oras nga 1:09.45, samtang ang mga kaubanan nga sila si Kenyans Abraham Missos (1:12.58) ug Francis Kakaui (1:14.14) mikompleto sa top five place.
Bugtong Sugbuanon nga naka-qualify alang sa National Marathon mao si Adonis Singson sa oras nga 1:15.56.
Samtang sa 21k women’s division, gipalagpot ni Agtew sa trono ang kampiyon sa miaging tuig nga si Mary Joy Tabal. Si Agtew mitapos sa lumba sa oras nga 1:24.12, samtang si Tabal nagsunod sa ikaduhang dapit sa oras nga 1:27.23.
Gawas ni Tabal, wala nay laing female runners nga nakaabot sa qualifying time alang ngadto sa National Marathon sa Manila sa Disyembre. Si Mary Jane Beboso kinsa maoy third placer pakyas human siya milapas sa 1:35 mark sa iyang oras nga 1:39.52. (BANAT NEWS)