Lite Shipping hari sa JCI-JBA basketball tournament

CEBU, Philippines - Gilangkat sa Lite Shipping ni team owner Jonathan 'Niño' Imboy ang korona sa JCI-Jaycees Basketball Association (JBA) 2011 Metro Cebu Uptown Jaycees human sa ilang 62-50 nga kadaugan batok sa Cebu Unique Trade sa championship match nga wala matiwas tungod sa away nilang ex-Lancer Randy dela Pisa ug Rodrigo Bruzon sa Unique Trade niadtong Huwebes didto sa Benedicto College gym didto sa dalan A.S. Fortuna, Mandaue City.

Nahunong ang duwa sa katapusang 50 segundos sa third period ug kay midawat na ang Unique Trade sa ilang kapildihan, pormal nga gideklarar sa organizers ang Lite Shipping ni coach Boy Te ug team consultant Elmer 'Boy' Cabahug nga maoy kampiyon.

 Nagsugod ang kagubot dihang nagkainitay silang Dela Pisa ug Bruzon sa undergoal samtang nagpagahiay sila atol sa usa ka rebounding. Masuk-anong mi-react si Bruzon ug na-ejected sa maong duwa, samtang si Dela Pisa, kinsa maoy nangu sa Lite Shipping sa iyang 16 puntos, gitawgan og technical foul.

Si Lawrence Maraño mihakot og 12 puntos alang sa Unique Trade, samtang si Bruzon midugang og 10 puntos.

Sa laing bahin, si Tonyson Lee, usa ka iladong Cebuano concert promoter, mipauwan og 15 ka three pointers alang sa iyang career-high 45 puntos aron pangulohan ang My Phone, kinsa miangkon sa ikatulong puwesto.

Gipilde sa My Phone ang Mang Inasal ni team owner Carlos Porras sa iskor nga 104-90. 

Sama ni Lee, si Porras miposa sab og 15 ka triples sa kinatibuk-an niyang 45 puntos aron sab pangulohan ang iyang koponan.  (BANATSPORTS)