Le Tour de Filipinas papadyak sa Abril 2012

MANILA, Philippines - Magpapatuloy ang Le Tour De Filipinas (LTDF) bilang pinakaprestihiyosong cycling event sa ban­sa matapos ilagay uli ng international body na Union Cycliste Internationale (UCI) ang karerang ito sa kanilang kalendaryo sa 2012.

Sa isinagawang World Congress sa Vancouver ay nagdesisyon ang pamu­nuan ng UCI na ilagay ang ikatlong edisyon ng LTDF mula Abril 14 hanggang 17.

Ang Le Tour De Filipinas ay isang Category 2.2 at isang men elite race.

Utak ng pakarerang ito ay si cycling patron Bert Lina habang ang Dynamic Outsource Solutions, Inc. (DOS-I) ang siyang organi­zers.

Dahil sa patuloy na bas­bas ng UCI, tiyak pa rin ang pagdalo ng mga bigating dayuhang siklista na magpapatingkad sa kompetisyon.

Ang unang edisyon ay dinomina ni David McCann ng Ireland at kumampanya sa ilalim ng Giant Asia team habang si Rahim Emami ng Iran ang nanalo sa ika­la­wang taon gamit ang tan­yag na Azad University.

Bagamat malakas pa rin ang mga dayuhan, bi­­nibigyan naman ng ma­gandang laban ang mga Fili­pino cyclists lalo nga’t unti-unti na nilang nagagamayan ang makaharap ang mga mahuhusay na dayuhang katunggali.