MANILA, Philippines - Walang sinasayang na araw ang anim na boksingerong ilalaban ng ABAP sa 2011 AIBA World Boxing Championships sa Baku, Ajerbaijan.
Dumating ang delegasyon nitong Biyernes ng gabi at kinabukasan ay agad na nagsanay para mapanatili ang magandang kondisyon bilang paghahanda sa mabigat na laban.
Isinagawa ang draw nitong Linggo at naniniwala ang pamunuan na maganda ito at malaki ang tsansa ng mga pambato ng bansa na malusutan ang first round bouts.
Unang sasalang si light flyweight Mark Anthony Barriga ngayon laban kay Stefan Caslarov ng Romania.
Sunod na aakyat ng ring bukas ay si Asian Games gold medalist sa flyweight Rey Saluldar laban kay Tanjit Lally ng Canada.
Si Doha Asian Games gold medalist Joan Tipon ay sasalang sa Setyembre 28 laban kay Alberto Melian ng Argentina sa bantamweight habang si welterweight Delfin Boholst at light welterweight Rolando Tacuyan ay mapapalaban sa Setyembre 29 laban kina Stephan Danyo ng Netherlands at Mehdi Toloutibandpi ng Iran ayon sa pagkakasunod.
Ang lightweight na si Charly Suarez ay masusukat kay Luis Porozo ng Ecuador sa Oktubre 1.