2nd Aloguinsan Mayor's Cup mosikad karong adlawa didto sa Alodome

CEBU, Philippines - Walo ka koponan ang magtigi sa 2nd Aloguinsan Mayor's Open basketball tournament nga buksan karong adlawa didto sa Alodome sa lungsod sa Aloguinsan, Cebu.

Unang magsangka mao ang Triple L batok sa Charmys, sundan sa duwa tali sa Energy Capsule batok sa Aces.

Matud pa ni sports coordinator councilor Manuelito Biton nga ang teams gibahin ngadto sa duha ka brackets.

Nagtapok sa bracket A mao ang Aces, Triple L, Charmys ug Energy Capsule, samtang ang nagpundok sa bracket B mao ang Carmen Copper Corp., Akira/Metrolites, Gerongco Lumber ug Angilan Destroyers.

Ang kampiyon ning maong torneyo makadawat og P100,000, ang second placer makaangkon og P75,000, samtang ang third mobulsa og P50,000. Ang fourth placer gantihan og P10,000.

Ang torneyo gipaluyohan ni Aloguinsan Mayor Chonse Moreno, vice mayor Cynthia Moreno ug sa tanang sakop sa municipal council nga gipangulohan ni Biton.  (BANATSPORTS)