BAGUIO CITY, Philippines – Naiibang Manny Pacquiao ang matutunghayan sa kanyang pakikipagharap kay Mexican Juan Manuel Marquez sa Nobyembre 12.
Kaya naman sa ensayo pa lamang ay ibang pagpapakondisyon na ang ginagawa ni Pacquiao.
“Patindi nang patindi ang training natin,” wika kahapon ni Pacquiao matapos ang kanyang pagtakbo sa Philippine Sports Commission oval track dito sa Teachers Camp. “Padagdag nang padagdag ‘yung oras ng training.”
Itataya ni Pacquiao ang kanyang suot na World Boxing Organization (WBO) welterweight belt laban kay Marquez sa Nobyembre 12 sa MGM Grand sa Las Vegas, Nevada.
Nakakasabay rin ng Filipino boxing superstar sa paghahanda sina Filipino boxers Lorenzo Villanueva at Rodel Mayol.
“Sini-sharei ko ‘yung mga nalalaman ko sa strategy, kung paano bumilis,” dagdag ng Sarangani Congressman. “Maganda kasabay ko sila mag-training.”
Sinabi naman ni Filipino trainer Buboy Fernandez na ang tunay na preparasyon ay mangyayari sa ikalawang linggo nila ni Pacquiao.
“Hindi basta-bastang boksingero kasi si Marquez kaya dapat paghandaan, kahit na sabihin na nating tinalo natin siya ng isang beses, eh dapat handa pa rin si Manny,” wika ni Fernandez.
“Kailangan nating mag-ensayo ng mabuti,” dagdag naman ni Pacquiao.
Halos dalawang buwan kung maghanda si Pacquiao sa kanyang mga nakaraang laban. Ngunit laban kay Marquez, humiling pa si Pacquiao ng dagdag na dalawang linggo.
Isang draw ang naitakas ni Marquez sa kanilang unang pagkikita noong 2004 at inagaw ni Pacquiao ang WBC super featherweight title ni Marquez noong 2008.