CEBU, Philippines - Gisugat og daog ang defending champion Police Beat ug City Hall reporters dihang ilang gipukan ang tagsa-tagsa nilang kaatbang sa pagsugod sa Press Freedom Cup 2011 basketball tournament kagahapon didto sa Cebu City Sports Institute.
Ang Police Beat nakaipsot sa mga kamot sa Courts reporters, 75-72, samtang gipilde sab sa City Hall ang runner-up sa miaging tuig nga Sportswriters Association of Cebu (SAC), 65-54.
Nagbinayloay og mga puntos ang Police Beat ug Courts cagers nga miresulta sa panagtabla, 40-all sa nahabiling 1:32 sa dili pa ang halftime.
Mikiat ang higanteng si Robert Sabequil sa final period nga mipupo og 13 sa iyang 21 puntos aron hatagan ang Police Beat og tres puntos nga labaw, 75-72 sa katapusang singko minutos sa maong kuwarter.
Sa sayo pa, nahawngan ang SAC-Veranda sa mga tag-as nga players sa City Hall nga gipangulohan ni Philip Cerojano kinsa adunay 27 puntos. Nangulo sa SAC-Veranda mao si Jonas Panerio pinaagi sa iyang 27 puntos. (BANATSPORTS)