CEBU, Philippines - Minaro ug dili usa ka agresibo nga Manny Pacquiao ang makit-an sa mga boxing fans sa ikatulong away niini uban ni Mexican champion Juan Manuel Marquez karong Nobiyembre 12 didto sa MGM Grand Garden Arena sa Las Vegas, Nevada.
Giangkon ni Freddie Roach nga may sayop silang nabuhat atol sa unang-duha ni Pacquiao batok sa Mehikanong si Marquez.
Giklaro ni Roach nga nakorehian na niya kini ug lahi nga Pacquiao na ang ikaharong ni Marquez ibabaw sa ring.
Namahayag si Roach nga bara-bara ang estilo nga gipakita ni Pacquiao sa unang-duha ka sangka nga haom sa usa ka counter-puncher sama ni Marquez.
Tungod niini, likayan ni Pacquiao ang direkta nga makig-"bell-to-bell" batok ni Marquez, inay mogamit siya og "lateral movements" aron makapasud sa iyang mga power-punch.
"We will be more scientific in this fight," matud pa ni Pacquiao sa The Philippine Star. "We’re not going to walk into his punch."
Usa usab sa tutokan ni Pacquiao mao ang mga hait nga uppercuts gikan ni Marquez nga maoy nakit-an ni Roach nga labing lig-on nga hinagiban sa Mehikano.
Si Roach uban ang mga boksidor nga magsilbeng spar-mates ni Pacquiao moabot dinhi sa Pilipinas karong Sabado aron sugdan ang ilang training camp didto sa Baguio City. (BANAT NEWS)