Orcollo, Alcano talsik sa Last 8

MANILA, Philippines - Kagaya nina Filipino pool greats Ef­ren ‘Bata’ Reyes at Francisco ‘Django’ Bustamante, dumanas rin ng kamalasan sina Dennis Orcollo at Ronnie Alcano sa 2011 World Cup of Pool.

Nakalasap sina Orcollo at Alcano ng isang 8-9 kabiguan sa magkapatid na Ko Pin-yi at Ko Ping-chung ng Chinese-Taipei sa quarterfinal round noong Sa­bado ng gabi sa Block Atrium sa SM North Avenue sa Quezon City.

Kinuha nina Orcollo, natalo kay Ralf Sou­quet ng Germany sa finals ng nakaraang World Pool masters, at Alcano ang isang 5-1 kalamangan laban sa mga bagitong sina Pin-yi at Ping-chung.

Subalit sa kanila ng kanilang edad na 15 at 22-anyos, hindi bumigay ang mag-utol na Ko.

Inagaw nina Pin-yi at Ping-chung ang 7-5 bentahe nang sikwatin ang sumunod na pitong racks papunta sa 8-6 abante.

Inubos naman nina Orcollo at Alcano ang dalawang lamesa upang itabla ang laro sa 8-8.

Ngunit ang pagkakamali ni Alcano sa No. 8 ball sa deciding rack ang tuluyan nang nagpanalo sa mga Taiwanese.

Makaaran namang biguin sina Orcollo at Alcano, yumukod sina Pin-yi at Ping-chung kina Nitiwat Kanjanasri at Kobkit Palajin ng Thailand, 3-9, sa semifinals kahapon.

Nakatakdang sagupain nina Kanjanasri at Palajin sa finals kagabi sina Souquet at Thorsten Hohmann ng Germany, sumibak kina Lee Gun Jae at Hwang Yong ng Korea, 9-7, sa semis.

Tinalo nina Souquet at Hohmann sina Reyes at Bustamante, nagkampeon sa torneo noong 2002 at 2009, 9-1, sa Last Eight.