CEBU, Philippines - Aron makatigum og dugang pundo nga makasuporta sa ilang mga mapuslanong programa ug proyekto, ang Junior Chamber International (JCI) Cebu-Mactan Channel mopasiugda og fun run nga uloha'g "JCI Run-To-Lead, Run for a Cause" karong Septiyembre 18 diha sa Parkmall ground, Mandaue City.
Usa sa ilang gilusad nga programa mao ang award-winning nga "Read to Lead," usa ka proyekto nga gitumong aron pagpalambo sa reading skill o abilidad sa pagbasa nga unta mahimo kining batasan sa mga tinun-an nga nagpanuigon gikan sa 10 ngadto sa 12 anyos pinaagi sa pagpanghatag og libro niadtong mga tunghaan nga ilang gihimong mga beneficiaries.
Adunay tulo ka kategoriya nga mahimong daganan sa mga partisipante ug kini mao ang 12K, 6K ug 3K fun run.
Adunay special category alang sa mga sakop sa JCI ug sa PWD (Person With Disabilities). Sa dili pa magsugod ang lumba, adunay pagahimuon nga stretching ug aerobic session.
Ang registration fee nagkantidad og P300 alang sa regular runners ug P250 alang sa mga estudyante, samtang ang mga runners nga adunay grupo makalibre og usa sa matag 10 ka runner nga morehistro.
Mahimong magparehistro sa Runnr sa Ayala Center, Enash Makeup Studio, Parkmall, Cebu City Sports Center ug sa Banana Babies sa Banilad Town Center
(BTC).
Mga ganting salapi ug medalya ang nagpaabot sa mga mananaog.
Alang niadtong gustong mosalmot, mahimong mokontak o motawag ni Che sa 0905-9991937 ug ni Eli Espina sa 0929-112-5050. (BANAT NEWS)