Germany mabigat na kalaban sa WPA
MANILA, Philippines - Kung may isang koponan na tila mahirap tibagin sa idinadaos na 2011 World Cup of Pool, ito ang German team na binubuo nina Ralf Souquet at Thorsten Hohmann.
Nagpakita ng husay sa pagtumbok at kontrol sa bola, sina Souquet at Hohmann ay umukit ng 8-0 panalo laban kina Greg Jenkins at David Rothall ng Australia sa unang laro kahapon sa SM North EDSA Mall sa Quezon City.
Kumbinsido naman si Hohmann na magiging produktibo ang kanilang tambalan ni Souquet lalo nga’t pareho silang nagmula sa malalaking panalo bago ang torneong ito.
Sunod na kalaban ng Germany ay ang Malaysia sa second round nang manalo sina Ibrahim Amir at Patrick Ooi kina Stephan Cohen at Vincent Facquet ng France, 8-6.
Sina dating kampeon Efren “Bata” Reyes at Francisco “Django” Bustamante ng Pilipinas ay nakasama rin sa mga lumusot sa first round nang kunin ang 8-4 panalo laban sa di pa gaanong bihasang sina Omar Al Shaheen at Khaled Al Mutaira ng Kuwait.
- Latest
- Trending
