Greece na-upset sa Macedonia

CEBU, Philippines - Mibahug og 27 puntos ang lumad sa New Orleans nga si Bo McCalebb kaniadtong Sabado aron pangulohan ang Macedonia ngadto sa usa ka upset nga kadaugan batok sa Greece sa iskor, 72-58 sa nagpadayong European Championship.

Ang Greece gipangulohan ni Antonis Fotsis kinsa miligwat og 16 puntos ug si Ioannis Bourousis midugang og 10 puntos uban sa iyang 10 ka rebounds apan wala makahuygo sa fourth quarter.

Ang duha ka kampo pareho na karong naghupot og 2-1 nga baraha sa Group C.

Diriyot mausik ang otso puntos nga labaw sa Macedonia sa wala pa sila makahimo'g 11-0 run sa sayong bahin sa fourth quarter diin ilang gitinuod ang Greece aron dili na makabangon og usab.

“Obviously, we played terrible,” matod pa ni Nikos Zisis kinsa miamot lang og nuybe puntos apan may walo ka rebounds alang sa Greece. “The coach told us that Macedonia was going to play with a lot of passion, with a lot of heart and I think that was the main reason why they won this game,” sumpay ni Zisis.

    Sa laing duwa, midaug ang Finland sa labing unang higayon sa European Championship sukad niadtong 1977 dihang ilang gipukan Bosnia-Herzegovina 92-64 dihang mibahug ug 17 puntos si Mikko Koivisto kinsa maoy nangu sa ilang 34-18 nga rally sa third quarter.

Ang Croatia aduna karo'y 2-1 nga baraha sa Group C human ilang gipilde ang Montenegro 87-81 luyo sa 26 puntos ni Ante Tomic kinsa mihimo'g 12 of 16 gikan sa field. Midaug sab ang Ukraine sa unang duwa sulod sa 10 ka tuig human ilang gilatos ang Bulgaria 67-56.

Pareho na sab nga adunay 1-2 nga baraha sa Group D ang Ukraine ug Bulgaria.     Ang Slovenia (3-0) midaug batok Georgia 87-75 ug ang Russia (3-0) midazug batok sa walay daug-daog nga Belgium 79-58 sa Group D.

Ang Croatia kinsa napilde sa Macedonia sa miaging duwa, kinahanglan pang maningkamot aron modaug batok sa Montenegro nga nagbaton og 1-2 nga baraha.

Si Marko Popovic mihakot og 23 puntos alang sa Croatia lakip ang duha ka free throws sa kataposang singko segundos. Mi-iskor ug lay-up si Tomic may 1:09 ang oras aron himoon kining 82-77 aron pagselyado sa kadaugan.

Si Dontaye Draper mihimo'g 12 ka assists ug may nuybe puntos alang sa Croatia samtang si Goran Jeretin maoy nangu sa Montenegro sa iyang 18 puntos ug si Vladimir Dragicevic midugang og 17 puntos.  - BANAT NEWS