Marquez 8-1 underdog

CEBU, Philippines - Sama sa gipaabot, migawas nga 8-1 underdog si Mexican boxing superstar Juan Manuel Marquez alang sa nagsingabot niyang sangka batok ni WBO welterweight champion Manny Pacquiao sa Nobiyembre 12 didto sa MGM Grand Garden Arena sa Las Vegas.

Apan ang 37-anyos nga si Marquez nagkanayon nga wala na siya mahibung niini og wala niya panumbalinga ang mga panagna sa pipila ka boxing analyst nga mipagamay sa iyang tsansa nga mudaog sa ikatulo nilang sangka ni Pacquiao.

Miabot na usab sa punto nga giganahan na si Marquez nga makadungog sa mga panahom sa iyang kritiko nga sayun ra siyang mapilde ni Pacquiao.

“I don’t care what they think, I don’t care,” matud pa ni Marquez kinsa bag-o lang mipahigayun sa labing una nilang press tour ni Pacquiao niadtong Sabado didto sa Quirino Grand stand. “I need to prepare myself. I don’t think about the bets. This is a tough fight for me. But I like this kind of fight.”

Sa iyang bahin, ang trainer ni Marquez nga si Nacho Beristain mipahibalo nga motimbang ang iyang batos og 146 ngadto sa 147 lbs. sa maong away.

Atol sa pakighinabi sa Philboxing.com, ang legendary Mexican trainer nagtuo nga sukwahi sa gituohan sa kadaghanan, kaya ra kaayo ni Marquez nga makuha ang timbang nga giharian ni Pacquiao.

Hinuon, giklaro ni Beristain nga bisan pa sa pagbug-at sa timbang ni Marquez, salig siya nga magpabilin ang gipaspason sa iyang boksidor aron atbangan si Pacquiao.

“Speed will not be sacrificed. In the previous fights, Marquez countered Pacquiao’s speed with speed. With small steps backward, we make him lose his distance. Now, we will continue developing strategy. Marquez wants to dominate him and demonstrate that he won the first two fights.”  - BANAT NEWS