Semis nakataya sa banggaang Lady Stags, Lady Troopers
MANILA, Philippines - Pag-aagawan ng Lady Stags at Lady Troopers ang unang semifinals ticket, habang palalakasin naman ng Lady Eagles at Lady Sailors ang kanilang tsansa.
Magtatapat ang San Sebastian College at ang Philippine Army ngayong alas-4 ng hapon matapos ang laro ng Ateneo De Manila University at Philippine Navy sa alas-2 sa quarterfinal round ng Shakey’s V-League Open Conference sa The Arena sa San Juan.
Parehong nagbabandera ng matayog na 3-0 baraha ang Lady Stags at ang Lady Troopers kasunod ang Lady Eagles (1-2), Lady Sailors (1-2), Airwomen ng Philippine Air Force (1-2) at Maynilad Water Dragons (0-3).
Ang San Sebastian ang tanging tumalo sa Army sa pagtatapos ng elimination round via five-setter noong Agosto 18.
Ang Lady Stags ay kilala sa kanilang matinding opensa sa likod ni American import Lauren Ford, ang leading scorer at spiker ng torneo.
Si Ford ay may average na 21 hits at 48.88 percent success sa spikes bawat laro para sa Recoletos-based tossers.
Bukod kay Ford, muling aasahan ng San Sebastian sina Thai Jang Baulee, Joy Benito, Rubie de Leon, Jill Gustilo at Dafna Robiños.
Muli namang ibabandera ng Army ang mag-utol na sina Michelle at Marietta Carolino kasama sina Joanne Buñag, Dahlia Cruz at Rachel Ann Daquis.
- Latest
- Trending
