Lady Stags kumuha ng playoff
MANILA, Philippines - Sinikwat ng San Sebastian College ang playoff para sa isang semifinals berth, habang binuhay naman ng Philippine Air Force ang kanilang pag-asa.
Binigo ng San Sebastian ang Ateneo De Manila University, 25-22, 25-16, 24-26, 27-29, 15-9, sa quarterfinal round ng Shakey’s V-League Open Conference kahapon sa The Arena sa San Juan.
Bumandera si American import Lauren Ford para sa Lady Stags mula sa kanyang 32 hits.
May 3-0 rekord ngayon ang San Sebastian kagaya ng Philippine Army, nakahugot na rin ng playoff para sa isang semis seat, kasunod ang Ateneo (1-2), Air Force (1-2), Navy (1-2) at Maynilad (0-3).
Limang Lady Stags ang naglista ng pinagsamang 60 points, samantalang nakahugot ang Lady Eagles ng 28 hits kay Alyssa Valdez at 18 kills kay Fille Cainglet.
Sa unang laro, binuhay naman ng Air Force ang kanilang tsansa sa semifinals nang talunin ang Maynilad, 25-17, 25-17, 26-24.
Ang timeout ni Airwomen coach Ariel dela Cruz ang nagpalamig sa mainit na pagbangon ng Water Dragons para kunin ang third set.
- Latest
- Trending
