Lady Stags, Troopers hahataw ng 2 dikit na panalo sa Shakey's V-League
MANILA, Philippines - Kapwa tatargetin ng San Sebastian College at Philippine Army ang kanilang ikalawang sunod na panalo sa quarterfinal round ng Shakey’s V-League Open Conference sa The Arena sa San Juan.
Haharapin ng Lady Stags ang Lady Sailors ng Philippine Navy ngayong alas-4 ng hapon matapos ang salpukan ng Lady Troopers at Lady Eagles ng Ateneo De Manila University sa alas-2.
May magkatulad na 1-0 rekord ang San Sebastian at Army sa quarterfinals kasunod ang Navy (1-1), Philippine Air Force (0-1), Maynilad (0-1) at Ateneo (0-0).
Muling ibabandera ng Lady Stags ang leading spiker ng liga na si American reinforcement Lauren Ford katuwang sina Thai import Jang Baulee, Joy Benito, Rubie de Leon, Janette Doria at Jill Gustilo.
Nagmula naman ang Lady Sailors sa isang 25-15, 25-23, 25-16 tagumpay laban sa Water Dragons noong Martes.
Sasandigan naman ng Navy sina Michelle Laborte, ang leading blocker ng liga, Nene Bautista, Suzanne Roces, Cecile Cruzada, Rose Prochina at Janet Serafica.
Sa inisyal na laro, tatangkain ng Lady Troopers na makadalawa sa Lady Eagles na kanilang binigo via four-setter sa kanilang unang pagkikita sa eliminasyon.
Galing ang Army sa 25-20, 25-20, 26-24 paggupo sa Navy noong Linggo bago ang kanilang salpukan ng Ateneo, first conference champions.
- Latest
- Trending
