Philippines vs. Chinese-Taipei sa Davis Cup Asia

CEBU, Philippines - Human sa makasaysayanong sangka sa Pilipinas ug Japan, laing dakung tennis event na usab ang mahitabo sa Sugbu sa panagharong sa RP Team ug Chinese-Taipei sa Davis Cup Asia-Oceania Zone Group 1 sa Septiyembre 16 didto sa Plantation Bay Resort and Spa sa Lapu-Lapu City.

Naplansa na ang maong kalihukan human gipirmahan kagahapon ang "tripartite agreement" tali sa Philippine Tennis Association (PHILTA) ug Lapu-Lapu City government atol sa press conference didto sa Plantation Bay Resort and Spa.

Si Lapu-Lapu City chairman for sports and tourism councilor Harry Radaza, nagkanayon nga mas daku ang Davis Cup ning higayona tungod sa suporta sa PHILTA nga mihatag og P70,000 isip pundo alang sa pagpadagan sa maong kompetisyon.

Lahi sa miaging edisyon, mas barato na karon ang mga tiket sa sangka sa Philippines ug mga Taiwan.

Ang mga tiket mahimo nang mapalit didto sa Chris Sports sa SM ug Ayala Center-Cebu, Plantation Bay Resort and Spa ug mga sangang buhatan sa Cebuana Lhuillier.  - BANAT NEWS