CEBU, Philippines - Manglupad na usab ang kumo sa mga boksidor sa katapusang edisyon sa August leg sa 2011 Summit Natural Drinking Water Fight Night Amateur Series karong gabii diha sa Gaisano Countrymall carpark.
Dose ka paresan sa mga amateur boxing prospects gikan sa nagkadaiyang boxing clubs, tunghaan ug mga out-of-towners ang magbinukbukay sa premyadong amateur boxing series sa Sugbu.
Mga boksidor gikan sa Bacolod City nga sila si Jimboy Mayang, Brandon Tabares, John Rey Melligen ug JP Artienda ang motuyo pag-anhi aron sukdon ang katakus sa local boxers.
Si Mayang makigsangka ni Raul Yu sa Talamban, si Tabares makigharong ni Cherwellan Cantel, samtang si Melligen makigbatok ni Mardy Muaña ug si Artuenda makigtigi ni Elmo Traya sa Consolacion.
Moanhi sab ang taga-Sultan Kudarat nga si Marvin Lulu aron makigsinukliay og kinumo ni Mark Rotilles sa Phil-Australian Boxing Club (PABC).
Mokompleto sa mga boksidor nga moaway sa maong fight card mao sila si JK Malupay sa Cabancalan, Ferde San Roque, Jonathan Francisco sa Consolacion, Richie Montealto, Kevin Jake Catajara ug Christian Bacolod sa Mabolo. (BANATSPORTS)