72 teams moapil sa Handy Fix S-League

CEBU, Philippines - Adunay 72 ka koponan lukop nasud ang gilaumang mopakita'g aksiyon sa umaabot nga Handy Fix Super League National Open Inter-barangay basketball tournament nga duwaon sa    Manila, Cebu ug Davao.

Unang duwaon mao ang Metro Davao League karong Septiyembre 4, sundan sa Metro Manila League sa Septiyembre 11 ug sa katapusan ang Metro Cebu League karong Septiyembre 18 diha sa Capitol Parish Gym sa dalan Escario.

Adunay 24 ka koponan matag usa alang sa Luzon, Visayas ug Mindanao areas.

Mga opisyales sa torneyo sa pagpangulo ni Darren Evangelista sa Handy Fix ug Rey Cañete nga nibarog sa technical committee, namahayag nga ang torneyo bukas sa tanang basketbolista nga nagpangedaron og 25-anyos ug paubos.

Sa kadaghan sa mga partisipante, adunay pagahimuon nga regional eliminations diin ang teams gibuak ngadto sa duha ka brackets (A ug B) diin ang matag bracket adunay unom ka koponan nga mosubay og single round robin format. Ang regional finals duwaon sa Nobiyembre 12-13.

Ang unang-upat ka teams moabante sa crossover semifinals diin ang no. 1 moharong sa no. 4 seed ug ang no. 2 moduwa batok sa no. 3 team.

Gipahibalo ni Evangelista nga ang Cebu maoy mo-host sa national finals.

Ang national champion mobulsa og P25,000, ang second placer makadawat og P15,000, samtang ang third placer makaangkon og P10,000. Ang fourth placer gantihan og P5,000. (BANATSPORTS)