Cebu Blue Marlins modepensa sa ilang titulo sa Speedo swimfest

CEBU, Philippines - Human sa ilang malampusong kampanya sa 2011 Milo Little Olympics-Visayas, ang Cebu Blue Marlins (CBM) nga gibitoonan sa University of Cebu (UC) moatubang og laing hagit dihang modepensa sila sa ilang titulo sa Speedo G-League Swim series didto sa Dumaguete City karong weekend.

Ang short course competition sa pag-uyon sa Philippine Aquatic Sports Association (PASA) gimugna uban ang paglaum nga makakaplag og bag-ong talento alang sa nasudnong koponan.

Ang kalihukan gibahin-bahin ngadto sa lima ka area -- ang National Capital Region, Central ug North Luzon nga giusa, Bicol ug Southern Tagalog, Visayas ug Mindanao.

Mga koponan nga nagtinguha pagpalagpot sa CBM     sa ilang trono isip no. 1 team sa Visayas area mao ang Bohol Dolphins, Biniyaran Tadpoles sa Antique, Aklan Aqua Blades, Iloilo Sea Warriors, Negros Oriental Blue Dolphins, Silliman University Red Snappers, Negros Oriental Gold and Country Club Swimming Team ug ang Capiz Sting Ray.

Bisan pa niana, si coach Rolando Alvarez miandam na sa iyang mga batos nga kasagaran gikan sa UC uban sa University of San Carlos (USC), Cebu Eastern College (CEC) ug Labangon Elementary School.

Ang CBM langkuban ni MLO record-breaker Michael Ichiro Kong, Noel Trina ug Mathew Angelo Caneda, Marvincent ug Langeline Hermoso, Robin Jacobsen, Clarence Israel Gabunada, Joshua ug Jerose Rosada, Beth May Arellano, JOyce Huguete, Cristine Indaya, Romylin Nina Ignacio, Danielle Mae Ballesteros ug Mary Arlette Baller.

Uban usab nila silang Tristan Kirk ug Tara Kyla Ebon, Razel Cabajar ug Aaron Grant Embuscado sa USC, managsuong Navarro -- Anthony Linn, Anthony II ug Lyn Ann sa CEC ug Joebert ug Karen Mae Indaya sa Labangon Elementary School.  (BANATSPORTS)