Aguan midispatsar ni Melligen sa Summit fight series

CEBU, Philippines - Nagmalampuson si Jing Aguan sa iyang debut sa Summit Natural Drinking Water Amateur Fight series dihang iyang gilumsan sa iyang kinumo si John Rey Melligen didto sa Gaisano Countrymall carpark sa miaging gabii.

Ang taga-Kidapawan, North Cotabato nga si Aguan maoy nidala sa away batok sa taas na'g kasinatian nga si Melligen nga nakapakumbinser sa mga hurado nga mohatag kaniya og 3-0 nga kadaugan.

Laing boksidor nga midaog sa iyang debut fight mao si Victor Sito sa Phil-Australian Boxing Club (PABC) nga mirehistro usab og 3-0 nga kadaugan batok ni Marvin Lulu sa Sultan Kudarat.

Sila si Juren Labordo ug JP Atienda midaog batok nila ni Ritchie Montealto sa Consolacion ug Ryan Cagatulla sa PABC.

Duha ka University of the Visayas (UV) boxers nga sila si Bryan Remedio nga wala tugahi og suwerte kay nangapilde sila ngadto ni Polid Banal ug Wendel Acharon.

Mokompleto sa mga nidaog mao sila si Raul Yu ug Ferde San Roque sa Cabancalan, Marde Muaña sa Camotes ug Edu Rosal sa PABC. (BANATSPORTS)