Siyam ka kenyan runners managan

CEBU, Philippines - Miabot na karon sa siyam ka elite Kenyan runners ang kompirmadong modagan sa 2nd Aboitiz Race to Reduce Challenge karong Domingo diha sa Cebu International Convention Center (CICC).

Sayo kaayong nagparehistro silang Willy Tanui ug Abraham Missos, apan karong bag-o napun-an kini human nagpalista sila si Douglas Mwiti, James Tallam, Willy Rotich, Eliud Kering ug Stanley Ting sa 42K men’s class.

Duha ka Kenyan female runners nga sila si Peris Poywo ug Susan Jemutai ang mosuway usab pagsakmit sa korona.

Wala kini nagpasabot nga wala nay kahigayonan ang mga Pinoy runners nga maghari sa maong lumba ilabi na sa pagsalmot sa 42K marathon Philippine record holder nga si Eduardo 'Vertek' Buenavista.

Uban ni Buenavista mao ang mga tang-ang RP team runners nga sila si Bernardo Desamito, Rene Desuyo ug Eric Paniqui, samtang sa women’s category, ang Cebuana nga si Mary Joy Tabal maoy pambato sa nasud batok mga bisitang Kenyans.

Gawas sa kompetisyon sa 42K full marathon, liboan usab ka mga runners ang magginukdanay sa 21K half- marathon, 10K, 5K ug 3K fun run categories. (BANAT)