Theam Cargo/Mambaling 4-0 sweep sa elims

CEBU, Philippines - Dako'g natabang ang gitas-on ug ang experience alang sa Theam Cargo Forwarding Services/Mambaling dihang ilang gibaraw ang paghulga sa Alberto's Pizza aron maka-eskapo ngadto sa kulba-hinam nga 115-107 nga kadaugan ug miharus sa elimination round kaniadtong Sabado sa gabii atol sa nagpadayong St. Augustine Fiesta Cup 2011 basketball tournament didto sa Inayawan Sports Complex.

Bisan pa sa ilang labaw nga 13 puntos sa wala pa matapos ang third period, 82-69, naka-apas lang gihapon ang Alberto's tungod sa pagmangtas n i ex-USC Warrior point guard Vernini Tangarorang kinsa miposa og sagunson upat ka three-pointers nga maoy hinungdan sa ilang 99-98 nga abante ug nasundan sab kini sa laing labaw, 101-100 sa wala pa hingpit ipadaplin sa Theam Cargo ang Alberto's Pizza.

Apan wala matarug ang Theam Cargo ug gituboy kini sa beteranong sentro nga si Danny delos Santos kinsa mipasulod ug krusyal nga tirada sa undergoal aron pangulohan ang iyang team sa opensa pinaagi sa iyang 31 puntos.

Ang nakahatag og dugang kusog ug kalig-on mao ang bullstrong forward nga si Wowie Escocio, ang umaabot bantayanan nga player sa CESAFI kinsa mibahug ug 21 puntos.

Ang three-point artist sa Theam Cargo/Mambaling nga si Michael Sumayang miburak og unom ka triples ug mihakot og 24 puntos samtang si JR Lopez miabuno og 12 puntos gikan sa iyang upat ka three-pointers. 

Si Oliver Sanoy maoy nangu sa Alberto's sa iyang 30 puntos ug si Tangarorang miantug og 29 puntos. Ang laing sinaligan sa Alberto's mao si Danny Aying kinsa nag-igo sab sa gawas ug midugang og 24 puntos apan wala na siya mag-igo ug maayo didto sa fourth period. Ang Alberto's miduwa nga wala ang ilang sinaligang sentro nga si Enrico Llanto tungod sa laing kalihokan ug didto unta nag-uniporme si Alex Cainglet nga ilang gikuha isip import apan wala kini tugoti sa pagduwa tungod kay supak sa ilang rule o lagda nga adunay idugang nga player gikan sa orihinal nga listahan sa pagsugod sa torneyo. 

Ang Theam Cargo/Mambaling mitapos sa elimination round sa 4-0 nga baraha ug aduna pa unta sila'y usa ka duwa nga nahibilin apan miundang ang CHV nga ila untang kontrahon karong Sabado busa lima na lang silang nahibilin imbes unom ka teams sa Seniors A division.

Wala pa sukad makaduwa alang sa Theam Cargo ang higanteng ex-pro nga si Bonel Balingit hinungdan nga misamot kadako ang kahigayonan nga ang Theam Cargo/Mambaling maoy modaug sa korona.

Ang Theam Cargo gidumala ni Mambaling barangay councilor Emier Hamis ug gipang-iya ni Customs broker Olive Paraguas.

Ang torneyo gipahigayon isip usa sa mga kalingawan alang sa pista sa Inayawan karong Agosto 28.

Puntos matag usa:

Theam Cargo (115)---     Delos Santos 31, Sumayang 24, Escocio 21, Lopez 12, Daclan 8, Divinagracia 6, Duran 6, Martunillas 4, Camay 2, Alano 1

 Alberto's Pizza (107)--    Sanoy 30, Tangarorang 29, Aying 24, Groograd 13, Bode 5, Chua 4, Kasayan 2 Halftime: 56-54.  - BANAT NEWS