"Terminator" Araneta mipaundang ni Co sa YFC 5

CEBU, Philippines - Padayun sa iyang pagbangis batok sa mga fighters sa Yaw-Yan ArDigma si Mark “The Terminator” Araneta, ning higayuna dihang iyang gipaundang si Kyle “Hurricane” Co sa Mixed Martial Arts main event sa “Yaw-Yan ArDigma Fighting Challenge (YFC) 5: Recompense” niadtong miaging gabii sa Cebu Coliseum.

Ang pambato sa Team Unified MMA sa Mandaue nga si Araneta kinsa mirehistro usab og impresibong first round KO batok ni Mark Boyo niadtong Hunyo, mipakita sa iyang kusug dihang iyang gipaundang si Co sa 3:00 sa third round.

Human sa init nilang sinukliay, nahutdan sa hangin si Co nga maoy gipahimuslan ni Araneta aron molusad og nagpungasi nga mga kinumo nga maoy mipasurender ni Co.

Sa supporting bout sa MMA, gibalian ni Brazilian Jiu-jitsu specialist Johnlery Ian Caniga sa Yaw-Yan ArDigma ang mas daku nga si Theoderoc “Kid” Batuun sa Team Red Dragon pinaagi sa arm-bar submission.

Nangayu lang usab og 30 segundos si Renan “Limbas” Noblefranca sa Yaw-Yan ArDigma sa third round aron patulgon si Steve “D’ Lightning” Sevilleno of Team Mindanao Unified MMA.

Midaog usab pinaagi sa unanimous decision ang ex-URCC fighter nga si “Destroyer” Piloto batok ni Arthur “Spartan King” Barba sa Mindanao Unified Martial Arts (MUMA).

Lakip sa lista sa mga midaog mao ang laing tulo ka Yaw-Yan ArDigma fighters nga sila si Ruel “Akiyama” Resauro, Keith “Ice” Acapulco ug Geronimo “Daredevil” Etac.  - BANAT NEWS