Smart Gilas gipakauwawan ang Iran

CEBU, Philippines - Gibuntog sa Smart Gilas Pilipinas ang back-to-back champion Iran , 73-59, sa ilang opener sa William Jones Cup sa miaging gabii didto sa Hsinchuang Stadium sa New Taipei City.

Ang 6-foot-11 nga naturalized citizen nga si Marcus Douthit maoy nangulo sa National team sa iyang 24 puntos, apan gawas pa niini milampos usab siya pagdepensa sa higante sa Iran nga si Hamed Haddadi.

“Marcus Douthit played great defense, he did a lot of good things for us,” matud pa ni Gilas coach Rajko Toroman kinsa mao usab ang kanhi coach sa Iran team nga mikampiyon sa FIBA-Asia niadtong tuig 2007.

Ang 7-foot-2 nga NBA player nga si Haddadi miposa og 25 puntos, apan kuwang ra kini aron baswaton ang iyang koponan sa kadaugan batok sa hot-shooting Gilas.

Ang mga guwardiya nga sila si Mark Barroca ug JV Casio ang miabag ni Douthit sa opensa sa ilang 13 ug 11 puntos matag usa .

Sunod nga ikaharung sa Smart Gilas mao ang laing Asian power-house nga Jordan kinsa bag-o lang usab midaog batok sa United Arab Emirates, 91-72.  - BANAT NEWS