Carter, Singson nagbangis
CEBU, Philippines - Ang beteranang si Madelyn Carter ug reigning Milo regional champion Adonis Singson maoy mipatigbabaw sa tagsa-tagsa nila ka dibisyon sa Hero’s Run kagahapon didto sa The Terraces sa Ayala Center- Cebu.
Sila si Carter ug Singson migawas nga maoy labing paspas sa 10K open division sa maong lumba nga gisalmotan sa dul-an 1,500 runners diin pipila niini mga doctors, nurses ug staff sa Vicente Sotto Memorial Medical Center.
Gitapos ni Carter ang lumba sud sa 49 minutos ug 58.72 aron sakmiton ang korona sa 10K women's division. Laing beterana nga si Merlita Dunkin (50:27.17) ug Maribeth Akol (1:03.19) mipuwesto sa ikaduha ug ikatulong dapit.
Sa iyang bahin, si Singson maoy naghari sa men’s class sa oras nga 38:12.62, gisundan ni Riez Enriquez (38:14.34) ug Daniel Cardenas (48:13.14 ).
Sa 10K employees category, si Michael Claudio maoy mihawod human niya gitapos ang lumba sa oras nga 45:13.03 batok nila ni Jandy Dela Cruz (55:48.54) ug Rommel Cativo (56:56.43).
Sila si Jhean Andrin (22:30.43) ug Jess Gonzaga (17:50.75), mao sab ang nanghawod sa 5K division. (FREEMAN)
- Latest
- Trending
